Fl-1699, Laurica Agius waqqfet il-Conservatorio delle Zitelle (orfanatrofju għat-tfajliet foqra) taħt il-protezzjoni tal-Immakulata Kunċizzjoni fl-inħawi ta’ Santa Margerita f’Bormla. Dan ingħalaq 99 sena wara b’ordni maħruġa mill-ħakkiema Franċiżi fit-13 ta’ Ġunju 1798. B’xorti tajba, il-ħakma Franċiża ġiet fi tmiemha f’qasir żmien u dan il-Konservatorju reġa’ fetaħ il-bibien tiegħu fl-ewwel snin tas-seklu 19. Aktar minn hekk, dan inbena mill-ġdid fl-1810.
Is-seklu 19 ġab ukoll bidla fit-tmexxija tiegħu. Is-Sorijiet ta’ San Ġużepp tal-Apparizzjoni waslu Malta lejn nofs is-seklu 19 u fetħu dar u skola fil-Birgu. Ftit taż-żmien wara, huma ħadu f’idejhom dan il-Konservatorju bil-ħsieb li joffru edukazzjoni ċivika u morali lit-tfajliet foqra. Minħabba r-rabta tas-Sorijiet ma’ San Ġużepp, dan l-orfanatrofju tat-tfajliet beda jissejjaħ il-Konservatorju ta’ San Ġużepp.
Fl-1980, imbagħad, il-Konservatorju ta’ San Ġużepp f’Bormla mexa għal post akbar u attrezzat aħjar, sewwasew ġewwa Dar Sagra Familja, Ħaż-Żabbar. Il-bini f’Bormla għamel xi żmien mingħajr użu partikulari, sakemm ġie mibdul f’dar tal-anzjani fl-ewwel snin tas-seklu 21.
Il-Faċċata tal-Knisja
Il-knisja tinsab fiċ-ċentru tal-binja tal-Konservatorju u tifforma parti integrali mill-istess faċċata. Tinqasam fi tliet bajjiet. It-taqsima ċentrali għandha żewġ livelli. Il-livell t’isfel jospita l-bieb, filwaqt li l-livell ta’ fuq għandu tieqa arjuża u huwa inkurunat bi gwarniċun u frontispizju. Dan tal-aħħar jinkludi l-armi tal-Isqfijiet Vincenzo Labini u Ferdinando Mattei li kienu ta’ għajnuna kbira fit-twaqqif u ż-żamma ta’ dan il-Konservatorju. Oriġinarjament, iz-zuntier kien magħluq b’kanċell u bi gradi tal-ħadid.
Il-Knisja Minn Ġewwa
Il-Knisja ta’ San Ġużepp għandha pjanta ovali u tinkludi tliet artali. Il-kwadru titulari tpitter minn Sebastiano Conca u huwa kkumplimentat bi skulturi ta’ anġli adoraturi, tal-Ispirtu s-Santu taħt il-forma ta’ ħamiema, u tas-simboli Ġużeppini. L-artali laterali huma ddedikati lid-Duluri u lill-Assunta, u huma xogħol ta’ Guercino u Rocco Buhagiar rispettivament. Il-parti ta’ fuq tal-apside għandha rappreżentazzjoni ta’ pellikan jitma’ l-friegħ tiegħu bħala allegorija tal-Ewkaristija, filwaqt li l-erba’ pilastri maġġuri huma mżejna bi kwadri ta’ Ġanni Vella.
Dati Ewlenin
1699: twaqqif tal-Conservatorio delle Zitelle
1810: bini mill-ġdid
nofs is-seklu 19: mgħoddi lis-Sorijiet ta’ San Ġużepp tal-Apparizzjoni
1980: trasferiment tal-Konservatorju għal Dar Sagra Familja, Ħaż-Żabbar
Bidu tas-seklu 21: bidla f’Dar tal-Anzjani
