Il-Forti Rikażli jokkupa l-promontorju magħruf bħala l-Ponta tal-Forka fil-Kalkara. Dan il-promontorju fuq in-naħa ta’ barra tal-Port il-Kbir ingħata dan l-isem fl-1531, meta l-iskjavi li kienu ħadu sehem f’ribelljoni, ġew mogħtija l-forka f’dan is-sit.
L-ewwel fortifikazzjoni f’dan il-promontorju tmur lura għall-1629, meta kienu nbnew torri u batterija nofs tond bil-ħsieb li titnaqqas il-possibilità tal-ħrib tal-iskjavi. Uffiċjalment, dawn kienu msejħa t-Torri u l-Batterija ta’ San Petronju, iżda l-isem popolari tagħhom kien Orsi minħabba l-għajnuna finanzjarja tal-Kavallier Alessandro Orsi għall-bini tagħhom. Fl-istess waqt, dan l-ilsien art kien joffri theddida serja għad-difiża tal-Belt Valletta, u għaldaqstant il-ħsieb li jiġi fortifikat tajjeb baqa jbherren f’moħħ it-tmexxija tal-Ordni. Din il-ħtieġa saret aktar urġenti fl-1669, meta l-Ottomani rnexxielhom jirbħu l-belt ta’ Kandja fi Kreta u kien hawn biża’ li ser jerġgħu jaħbtu bil-qawwi fuq Malta.
Dlonk inġab Malta l-Inġinier Militari Taljan Maurizio Antonio Valperga, li wara evalwazzjoni tal-fortifikazzjonijiet preżenti fassal pjan għad-difiża tal-Port il-Kbir. Dan kien jaħseb (1) għall-bini ta’ dan il-forti fil-Ponta tal-Forok, (2) għall-ħolqien ta’ linja oħra ta’ swar quddiem is-swar ta’ Santa Margerita, u (3) it-tisħiħ tas-swar tal-Furjana. L-implimentazzjoni ta’ din l-iskema bdiet mingħajr telf ta’ żmien. Kif mistenni, din issarrfet fi spiża enormi għall-Ordni. Fil-fatt, il-proġett tal-Forti Rikażli seta’ jitwettaq grazzi għall-għotja ta’ 20,000 skud mill-Kavallier Giovanni Francesco Ricasoli. Ix-xogħol dam għaddej sal-1698, u kien jinkludi l-bini ta’ linja tas-swar mad-dawra kollha ta’ din il-peniżola.
L-aktar parti b’saħħitha tħares fuq ix-xaqliba tax-Xgħira. Din tikkonsisti f’linja ta’ swar f’għamla ta’ kuruna, sewwasew bastjun ċentrali, demi-bastjun f’kull tarf, u kurtina fil-meded ta’ bejniethom. Dawn huma msaħħa b’fausse braye (terrazzin mat-tul kollu tas-sur u aktar baxx mill-għoli tal-istess sur), u b’żewġ ravelini (wieħed quddiem kull kurtina). Din il-linja ta’ swar għandha wkoll foss u glacis.
In-naħa tal-forti li tħares fuq il-baħar miftuħ għandha erba’ bastjuni, filwaqt li l-parti li tħares għal fuq il-Port il-Kbir hija nieqsa mill-bastjuni u mid-demi-bastjuni sabiex ma tkunx tista’ tintuża kontra l-fortifikazzjonijiet l-oħra fil-Port il-Kbir f’każ li taqa’ f’idejn l-għadu. Minkejja li ġie armat bi 80 kanun, Forti Rikażli ma kienx b’saħħtu biżżejjed fl-eventwalità ta’ assedju fit-tul skont l-inġiniera militari Franċiżi li żaruh fl-1715. Għaldaqstant, ġie propost ridott addizzjonali fit-tarf tat-tramuntana tal-front ewlieni, iżda dan il-ħsieb baqa’ fuq l-ixkaffa sal-1789 minħabba nuqqas ta’ fondi.
Kif mistenni, is-sit imperreċ ta’ Forti Rikażli joffri sfidi partikulari għaż-żamma tal-bini. Minħabba li l-forti huwa mdawwar bil-baħar, il-ħitan bdew iġarrbu ħsarat mill-qilla tal-baħar sa minn kmieni. Fil-fatt, fis-sena 1752 kien jeħtieġ proġett estensiv ta’ manutenzjoni u restawr. Ħsarat oħra seħħew fl-1807, meta r-reġiment Ingliż stazzjonat fih irribella u l-forti kellu jittieħed lura bil-forza. L-andament tas-seklu 19 ġab aktar tibdil, speċjalment kawża tal-iżviluppi teknoloġiċi fl-artillerija. L-akbar tibdil seħħ b’rabta mal-istallazzjoni ta’ kanuni aktar b’saħħithom fis-snin 70.
Is-seklu 20 ħaffef ir-ritmu tal-iżvilupp teknoloġiku, u Forti Rikażli ra tibdiliet sostanzjali fl-artillerija u kif ukoll fil-bini ta’ strutturi ġodda bħat-torrijiet tas-searchlights. Dawn kellhom sehem importanti matul it-Tieni Gwerra Dinjija, speċjalment matul l-attakk tal-eboats f’Lulju 1941. Fl-istess waqt, Forti Rikażli ġarrab diversi ħsarat mill-attakki tal-għadu. L-aħħar deċenji ma tantx kienu ġenerużi ma’ dan il-forti, tant li l-parti l-kbira tal-ħsarat tal-gwerra baqgħu ma tranġawx, filwaqt li l-foss inbidel f’faċilità għat-tindif tat-tankijiet tal-fuel tal-bastimenti.
