Il-knisja preżenti nbniet fis-snin 60 tas-seklu l-ieħor fuq disinn tal-Professur R.V. Galea. Din ħadet post oħra mibnija fis-seklu 18 li ġġarfet fl-1942 mill-bumbardamenti tal-għadu. L-ewwel kappella mibnija fuq dan is-sit tmur lura għall-1462 u kienet iddedikata lill-Madonna ta’ Monserrat. Oriġinarjament, il-bieb ta’ din il-knisja kien jagħti għat-triq ta’ wara, u għaldaqstant l-art tal-binja l-ġdida kienet bosta metri ‘l isfel.
L-Ewwel Żewġ Knejjes
L-eqdem knisja f’dan is-sit inbniet mill-familji De Guevara u Inguanez. Għaldaqstant, l-armi araldiċi ta’ dawn iż-żewġ familji kienu skolpiti fuq il-bieb tagħha. Fl-1620, il-Knisja tal-Madonna ta’ Monserrat żdidulha żewġ artali laterali, wieħed iddedikat lit-Trinità Qaddisa u l-ieħor lil San Omobonu.
Fis-seklu 18, imbagħad, il-knisja nbniet mill-ġdid f’għamla ta’ rotunda min-nobbli Lucrezia Gauci Falzon. Din ġiet iddedikata lit-Trinità Qaddisa, u kienet imżejna b’emblemi b’tema trinitarja u kif ukoll b’żewġ anġli mal-ġnub tal-kwadru titulari.
Il-Faċċata
Il-faċċata tikkonsisti f’arranġament vertikali ta’ erba’ elementi ewlenin, sewwasew bieb, tieqa, frontispizju u kampnar fil-quċċata.
Minn Ġewwa
Il-knisja tikkonsisti f’navata bi tliet bajjiet u presbiterju mifrud minn magħha permezz ta’ arkata. Ix-xogħol tal-lavur sar minn Ġiġi Depasquale, filwaqt li l-kwadru titulari tpitter minn Rafel Bonniċi Calì. L-artal huwa maħdum fl-irħam.
Tagħrif ieħor
Fit-tiġrif tal-1942, waħda mill-qniepen ta’ din il-knisja waqgħet fil-Victualling Yard. Din kienet tmur għall-1523 u għaldaqstant is-supretendent tat-Tarzna rritornaha lill-Arċisqof Mikiel Gonzi fl-1944. Eventwalment, mat-tlestija tal-Knisja Parrokkjali ta’ Santa Luċija, din sabet ruħha fil-kampnar tagħha, iżda fl-1995 reġgħet lura fil-Birgu u tpoġġiet fil-Mużew tal-Parroċċa.
Dati Ewlenin
1462: bini tal-ewwel knisja mill-familji De Guevara u Inguanez
1582-1611: użata mill-patrijiet Karmelitani sa ma bnew knisja fil-qrib
1784: bini mill-ġdid fuq inizjattiva ta’ Lucrezia Gauci Falzon
1898: tkabbir tas-sagristija
1942: tiġrif mill-ħbit tal-għadu
1960: bini tal-knisja preżenti
1970: użu bħala Sede tal-Azzjoni Kattolika
2022: mgħoddija lill-Komunità Griega Kattolika
