Lejn l-aħħar tas-seklu 19, il-popolazzjoni tal-Kalkara żdiedet sew u l-Knisja tas-Salvatur, li sa dak iż-żmien kienet taqdi l-ħtiġijiet spiritwali tagħhom, saret żgħira wisq. Għalhekk, fit-23 ta’ Awwissu 1884, l-Isqof Carmelo Scicluna laqa’ t-talba tal-Kalkariżi għall-bini ta’ knisja ġdida fuq art mogħtija minn Fortunato Gulia. Il-pjanti saru minn Walter Attard, u l-ewwel ġebla tqiegħdet fit-22 ta’ Ġunju 1890 mill-istess Isqof. Ix-xogħol tal-bini tlesta fi ftit snin u nhar l-10 ta’ Diċembru 1897, l-Arċisqof Pietru Pace ħareġ id-digriet li permezz tiegħu l-Kalkara nqatgħet mill-Parroċċa tal-Birgu u saret parroċċa distinta taħt il-ħarsien ta’ San Ġużepp.
Ħsarat Irreparabbli
Din il-knisja ġiet ikkonsagrata mill-Arċisqof Mauro Caruana fit-30 ta’ Jannar 1921. Imbagħad, fl-1 ta’ Lulju 1923, l-istess Arċisqof qiegħed l-ewwel ġebla tal-kampnar, filwaqt li ġew ikkummissjonati diversi opri tal-arti sabiex iżejnuha. Madankollu, id-destin ma kienx ħanin magħha. Fl-10 ta’ April 1942, il-Knisja Parrokkjali tal-Kalkara ntlaqtet mill-bumbardamenti tal-għadu u ġarrbet ħsarat kbar. Il-lista tat-telfiet kienet tinkludi l-istatwa titulari ta’ San Ġużepp.
Il-Knisja Preżenti
Wara l-gwerra, ħafna wrew ix-xewqa li l-knisja l-ġdida tinbena f’post aktar prominenti. Għaldaqstant, l-Arċisqof Mikiel Gonzi xtara biċċa art qrib ix-xatt u rregalaha lill-Parroċċa tal-Kalkara. Il-pjanta saret minn Vincenzo Bonello u Ġużè D’Amato u l-ewwel ġebla tbierket mill-Arċisqof Gonzi f’Ottubru tal-1946. Ix-xogħol mexa b’ritmu tajjeb, tant li t-tberik u l-inawgurazzjoni saru fis-7 ta’ Settembru 1952. L-istess Arċisqof, imbagħad, ikkonsagraha fit-12 ta’ Diċembru 1954, filwaqt li l-koppla ġiet inawgurata fit-30 ta’ Ġunju 1962.
Il-Faċċata
Il-faċċata hija maqsuma fi tliet bajjiet u għandha bieb f’kull bajja. Il-bajja ċentrali għandha żewġ livelli, sewwasew portiku bil-kolonni u gallarija miftuħa rispettivament. Din tkompli tieħu dehra aktar arjuża grazzi għal frontispizju trijangolari li jinsab fl-ogħla parti u għall-fatt li l-bajjiet tat-truf jaslu biss sal-ewwel livell. Il-monumentalità ta’ din il-faċċata hija kkumplimentata miz-zuntier u t-taraġ spazzjuż ta’ quddiemha. Il-pjanta oriġinali kienet tinkludi wkoll kampnar, però dan qatt ma nbena.
Il-Knisja Minn Ġewwa
Il-knisja għandha għamla ta’ salib Latin magħmul minn korsija, żewġ kappelluni u kor. Il-korsija hi maqsuma fi tliet bajjiet u għandha għadd ta’ kolonni doppji li jġorru fuqhom arċipjan. Fl-istess waqt, l-erba’ pilastri maġġuri jerfgħu l-koppla. It-tqassim tal-korsija hu rifless fin-navi tal-ġnub. Dawn huma kkumplimentati minn kappelli fil-ġnub tal-kor. Fil-knisja nsibu diversi xogħlijiet tal-irħam, fosthom l-artal maġġur, il-paviment, l-ambone u l-pulptu.
Opri tal-Arti
Fost ix-xogħlijiet tal-arti misjuba f’din il-knisja, insibu l-vara titulari u l-pedestall tagħha li saru fl-1948 minn Ferdinando Stuflesser ta’ Ortisei, u diversi kwadri mpittra minn Giuseppi Calì, Filippo Venuti, Attilio Palombi u Lazzaro Pisani fost oħajn.
Dati Ewlenin
1897: twaqqif tal-parroċċa tal-Kalkara
1942: ħsarat estensivi mill-bumbardamenti tal-għadu
1946: tberik tal-ewwel ġebla tal-knisja l-ġdida
1952: tlestija tal-bini tal-knisja l-ġdida
1954: konsagrazzjoni tal-knisja l-ġdida
1962: inawgurazzjoni tal-koppla
