F’Diċembru 1625, l-Isqof Baldassare Cagliares u familtu taw b’donazzjoni s-sit ta’ dan il-kumpless lill-Patrijiet Tereżjani. Min-naħa tagħhom, il-Patrijiet dlonk bnew knisja ċkejkna sabiex ikunu jistgħu joffru servizz fl-iqsar żmien possibbli. Din il-knisja ċkejkna tbierket f’Jannar 1626 mill-istess Isqof. Ix-xogħol fuq il-bini tal-kunvent u l-knisja preżenti nbeda wkoll mingħajr telf ta’ żmien. Il-kunvent tlesta fi ftit xhur, filwaqt li l-knisja tlestiet fl-1633. Din hija meqjusa l-ewwel knisja fid-dinja li ġiet iddedikata lil Santa Tereża ta’ Avila. Il-konsagrazzjoni tagħha saret mill-Isqof Vincenzo Labini fl-1787.
Il-Kunvent
Fit-2 ta’ Marzu 1633, il-Papa Urbanu VIII waqqaf Kulleġġ Missjunarju Internazzjonali tal-Ordni Tereżjan f’dan il-kunvent. Dan minħabba x-xebh tal-ilsien Malti mal-ilsna mitkellma fl-artijiet tal-Afrika ta’ Fuq u tal-Lvant. B’hekk kien ikun eħfef għall-missjunarji Ewropej jitgħallmu l-ilsna Semitiċi fl-ambjent ta’ Malta.
Il-Faċċata tal-Knisja
Il-faċċata tikkonsisti fi tliet bajjiet. Il-bajja ċentrali hi mibnija fuq żewġ saffi. Il-bieb hu definit b’pannell sporġut u għandu frontispizju miftuħ u niċċa. L-istess pannell jibqa’ tiela fis-saff ta’ fuq u jservi ta’ bażi għall-frontispizju magħluq. Il-kompożizzjoni ta’ dan it-tieni saff hija artikulata permezz ta’ tieqa kbira ċentrali u niċċa mdaqqsa fuq kull naħa. L-elevazzjoni tal-bajjiet tal-ġnub tieqaf mal-gwarniċ tal-ewwel saff, u hija minfuda minn tieqa eleganti. Iż-żewġ statwi li nsibu fin-niċċa ta’ fuq il-bieb u fuq il-frontispizju jirrappreżentaw lill-Madonna ta’ Trapani u lill-Santa Tereża ta’ Avila rispettivament. Din tal-aħħar inħadmet minn Chris Ebejer fl-2016.
Il-Knisja Minn Ġewwa
Il-knisja tikkonsisti f’korsija, presbiterju u sitt kappelli. Il-presbiterju huwa mifrud mll-korsija permezz ta’ arkata, u huwa ddominat minn prospettiva Barokka b’erba’ kolonni skulturati u għadd ta’ anġli u emblemi. Il-kwadru titulari juri l-estasi ta’ Santa Tereża ta’ Avila. Dan tpitter minn Manuel Farrugia fl-2018, u ħa post pittura tas-seklu 17, xogħol ta’ Fra Luca Garnier b’interventi maġġuri minn Ġużeppi Caruana minħabba l-ħsarat li ġarrab waqt it-Tieni Gwerra. L-artal maġġur huwa tal-irħam u sar fl-1771 fuq disinn ta’ Francesco Zahra. Il-prospettivi tal-kappelli tal-ġnub huma kollha ta’ stil Barokk u għandhom artali tal-irħam.
Tagħrif Ieħor
Din il-knisja hija mogħnija b’għadd ta’ opri tal-arti. Dawn jinkludu xogħlijiet ta’ Mattia Preti, Enrico Arnaud, Antonio Xuereb u Rokku Buhagiar. L-istatwa ta’ Santa Tereża nħadmet minn Ġużeppi Caruana fl-1954. Statwa oħra interessanti tinsab fil-fetħa ta’ quddiem il-knisja. Din tirrapreżenta lil San Elija u nħadmet minn Vincenzo Dimech fl-1818 fuq ordni tal-barklori Bormliżi li kienu ngħaqdu fi fratellanza taħt il-patroċinju ta’ dan il-qaddis.
Dati Ewlenin
1626: bini tal-kunvent
1633: tlestija tal-Knisja ta’ Santa Tereża ta’ Avila
1633: twaqqif tal-Kulleġġ Missjunarju Internazzjonali tal-Ordni Tereżjan
1652: dfin tal-Inkwiżitur Carlo Cavaletti fil-Knisja
1714: għeluq tal-Kulleġġ Missjunarju Internazzjonali tal-Ordni Tereżjan
1787: konsagrazzjoni tal-knisja
1837: serqa ta’ pissidi bl-ostji kkonsagrati mit-tabernaklu tal-knisja (ara: ‘Il-Knisja ta’ Fejn Sabu s-Sinjur, il-Birgu’)
