Iċ-Ċimiterju ta’ Wied Għammieq huwa tifkira tal-epidemija tal-Kolera tal-1837. Din l-infezzjoni batterjali kienet tinxtered l-aktar minħabba nuqqas ta’ iġene, u kienet tikkawża dijarea, vomtu u uġigħ muskolari. Ħafna mill-infettati, speċjalment dawk l-aktar vulnerabbli, faċilment kienu jitilfu ħajjithom. Malta u Għawdex esperjenzew diversi mxija ta’ din il-marda, iżda l-aktar waħda qalila seħħet fl-1837. Din ħalliet xejn anqas minn 3,784 vittma f’Malta u 368 vittma f’Għawdex.
Iċ-ċentru tal-imxija tal-Kolera tal-1837 jidher li kien l-Ospizju (id-dar tal-anzjani u persuni b’abbiltajiet differenti) fil-Furjana. L-ewwel każi feġġew nhar id-9 ta’ Ġunju u f’temp ta’ erbat’ijiem kien hemm 25 fatalità. Is-sitwazzjoni kompliet teħżien u sabiex titnaqqas kemm jista’ jkun il-possibilità tat-tixrid, ġie deċiż li l-parti l-kbira tar-residenti tal-Ospizju jiġu rilokati għall-Forti Rikażli. Minkejja dan it-trasferiment, il-maġġor parti tar-residenti tal-Ospizju xorta spiċċaw infettati, u agħar minn hekk, ’il fuq minn 450 tilfu ħajjithom f’temp ta’ ftit gimgħat. Din is-sitwazzjoni ħolqot emerġenza fir-rigward tad-dfin, tant li dawn ġew midfuna mingħajr ħafna ċerimonji fl-akkwati ta’ Wieq Għammieq. Uħud minnhom saħansitra setgħu ġew midfuna qabel ħadu l-aħħar nifs. Magħhom indifnu madwar 400 vittma oħra tal-Kolera mill-Kottonera u l-madwar.
Iżda d-destin ma riedx li dawn il-vittmi jintesew. Anzi, mal-mogħdija taż-żmien bdiet tinbet devozzjoni lejhom u bdew jiġu meqjusa bħala erwieħ tajba li jaqalgħu l-grazzji. Għaldaqstant, bosta kienu jżuru l-oqbra tagħhom, speċjalment fl-ewwel Tnejn tax-xahar, biex jitolbuhom jew iroddulhom ħajr għal xi grazzji maqlugħin bl-interċessjoni tagħhom.
Dan wassal sabiex il-fdalijiet tagħhom jinqalgħu mill-oqbra rispettivi u jinġabru f’fossa waħda fl-1878. Tliet snin wara, din il-fossa ġiet immarkata permezz ta’ obelisk fuq bażi u b’salib fuqu. L-obelisk u s-salib intilfu maż-żmien, iżda l-bażi għadha hemm u tinkludi lapida li tgħid “Hawn għadam il-foqra li fis-sena 1837, ġewwa Rikażli nġabru u bil-Kolera mietu. Dan iċ-ċimiterju bi flus id-devoti sar fl-1881. Intom ikollkom ħniena, itolbu għas-serħan tagħhom.”
Iċ-ċimiterju ddawwar ukoll b’ ħajt u ġie attrezzat b’kappella ċkejkna. Imbagħad, lejn nofs is-seklu 20, inbniet knisja ġdida fuq disinn ta’ Vincenzo Bonello, filwaqt li nħolqot loġġa mid-daħla ’l ġewwa.
