DOMINIC MINTOFF
Dom Mintoff raġel minn Bormla li fassal l-istorja tal-gżejjer Maltin għal aktar minn nofs seklu. Huwa kien membru tal-Parlament mill-1947 sa l-1998, Priministru ta’ Malta mill-1955 sal-1958 imbagħad mill-1971 sal-1984.
Mintoff studja fis-seminarju u fl-Università ta’ Malta. Huwa rebaħ Scholarship minn Rodi grazzi għal dak li kien iħarrġu politikament, Paul Boffa li kien mill-Kottonera wkoll, u kien il-mexxej tal-Partit Laburista Malti. Huwa kompla l-istudji tiegħu f’Oxford u rritorna Malta fl-1943. Sentejn biss wara huwa kkandida ruħu għal siġġu fil-kunsill tal-gvern u fl-ewwel elezzjoni sar deputat mexxej tal-partit fl-istess sena. Fl-1947 ġie appuntat bħala Ministru tax-Xogħolijiet Pubbliċi u r-Rikostruzzjoni u kien responsabbli minn proġetti pubbliċi importanti li saru wara l-gwerra.
Sentejn wara, tilwima pubblika ma’ Boffa wasslet biex jinqasam il-Partit Laburista Malti, b’Mintoff jirnexxielu jneħħi lil Boffa minn mexxej. Fl-1955, bħala Priministru, huwa mexxa n-negozjati dwar l-integrazzjoni mal-Brittanja, imma fl-1958 kien ċar li dawn in-negozjati kienu fallew. Qam l-inkwiet fit-toroq u xi rappreżentanti u attivisti tal-partit ġew arrestati.
Kien hemm aktar inkwiet għal Mintoff fis-sittinijiet meta l-Partit Laburista Malti kellu xi jgħid mal-Knisja Kattolika Rumana mmexxija minn Mons Mikiel Gonzi. Din it-tilwima ġiet risolta fl-1969, u dan wassal għar-rebħiet tal-Partit Laburista Malti fl-1971, fl-1975 u fl-1981. L-iprem kisba fix-xogħol tiegħu kienu l-Kostituzzjoni tar-Repubblika fl-1974 u t-tneħħija tal-forzi armati Brittaniċi fl-1978. Mintoff irriżenja bħala Priministru fl-1984 imma baqa’ Membru Parlamentari sal-1998. Huwa miet fl-2012 fl-età venerabbli ta’ 96 sena.
Sorsi:
