JUAN BAUTISTA AZZOPARDO
Juan Bautista Azzopardo twieled l-Isla fl-1772. Peress li kien student li jipprometti, intbagħat fuq scholarship ġewwa Toulon fi Franza biex jistudja l-Arkitettura Navali. Oriġinarjament kien impjegat mill-Franċiżi u aktar tard mill-flotot Brittanniċi bħala kaptan ta’ bosta xwieni.
Huwa reġa’ lura jaħdem bħala kursar u ngħata liċenzja li tagħtih permess jattakka u jisraq bastimenti oħra, l-ewwel taħt il-bandiera Olandiża u aktar tard dik Spanjola. Dan il-permess kien iħalli lil Azzopardo jattakka xwieni tal-għadu skont kif miftiehem. Huwa kien kursar ta’ suċċess.
Fi tmiem it-tmintax-il seklu, huwa ġie involut mal-Arġentina, li dak iż-żmien kienet tal-Ispanjoli. Waqt l-Ewwel Invażjoni Brittannika ta’ Buenos Aires, bħala parti mill-ekwipaġġ tal-frejgata Dromedario, hu ngħaqad mat-truppi waqt l-aħħar attakk fuq il-fortizza Brittannika. Fit-tieni invażjoni Brittannika fl-1807, il-frejata tiegħu trasportat biċċiet tal-artillerija fuq ix-Xmara Paraná għad-difiża tal-belt. Għall-kuraġġ u l-atti ta’ qlubija tiegħu huwa ngħata l-grad ta’ Logutenent Kulunel tal-Militja Urbana mill-Gvern Irjali Spanjol. Fl-1808, Azzopardo rtira mix-xogħol tiegħu fejn kien jattakka x-xwieni.
Fl-1810, Azzopardo ngħaqad mal-forzi rivoluzzjonarji li kienu qed jippruvaw jiksbu l-indipendenza tal-Arġentina minn Spanja. F’dan iż-żmien, huwa ngħata l-kmand tal-ewwel flotta navali Arġentina li kienet tikkonsisti fi tliet xwieni. Fil-Battalja ta’ San Nicolás, li saret fit-2 ta’ Marzu 1811, kontra forzi uperjuri, Azzopardo tilef il-battalja, weġġa’ u spiċċa priġunier tal-Irjalisti. Huwa ġie lliberat wara disa’ snin u rritorna lejn l-Arġentina bħala eroj. Huwa ngħata t-titlu ta’ Mastru tal-Port ta’ Buenos Aires, titlu li żamm sal-1826. Irtira fl-1827 u qatta’ l-bqija ta’ ħajtu ma’ martu u ibnu, sal-mewt tiegħu fl-1848.
Sorsi:
https://web.archive.org/web/20200216070552/http://www.islalocalcouncil.com/promseng.htm
